Hér færðu fréttir og aðrar gagnlegar upplýsingar um kvennafrídaginn 2010, um viðburði honum tengdum og skipuleggjendur og skipulag, auk þess sem stiklað er á stóru í sögu kvennafrídagsins.
Vefurinn verður í stöðugri þróun, eftir því sem undirbúningi vindur fram, en kvennadagurinn verður að þessu sinni með nokkuð breyttu sniði.
Á sjálfum kvennafrídeginum, sunnudaginn 24. október, fer fram alþjóðleg ráðstefna í Reykjavík undir yfirskriftinni Konur gegn kynbundnu ofbeldi. Mánudaginn 25. október fylkjum við svo liði um land allt.
Við viljum jafnrétti, á öllum sviðum samfélagsins. Við krefjumst jafnrar stöðu og jafnra réttinda kvenna og karla, óháð því hvort menning og listir eiga í hlut, fræði og vísindi, atvinnulíf, stjórnkerfi eða réttarkerfi.
Við sættum okkur ekki við að þeir glæpir sem koma þyngst niður á konum og börnum viðgangist í skjóli þagnar og úreltra viðhorfa. Við unum ekkert frekar kynbundnu launamisrétti eða gengisfellingu kvenna eftir því sem ofar dregur í metorðastiga samfélagsins.
Fylgstu með og brýndu raustina. Dagana 24. og 25. október ætlum við að hafa hátt.
RSS straumur