Við komum saman við Arnarhól kl. 14:00. Konur og kvár sem búa í nærliggjandi sveitarfélögum eru hvött til að koma til Reykjavíkur og taka þátt.
Hópar baráttufólks er í óðaönn að skipuleggja viðburði um allt land.
Það verða mörg tækifæri til að koma saman og ýmis félög að skipuleggja viðburði á deginum sjálfum eða í aðdraganda hans.
En hvað ef ég get alls ekki farið í verkfall?
Konur og kvár vinna fjölmörg störf þar sem þjónusta getur ekki með nokkru móti dottið niður, svo sem í heilbrigðisgeiranum, í þjónustustörfum við fatlað fólk, aldrað fólk eða annað jaðarsett fólk. Þessar konur og þessi kvár eru #ómissandi. Við hvetjum þetta #ómissandi fólk til að sýna stuðning sinn í verki með því að fá vinkonu eða fjölskyldumeðlim til að mæta í sinn stað á baráttufund eða með því að setja mynd af sér á samfélagsmiðla á deginum undir myllumerkinu #ómissandi. Þá er hægt að senda kveðju á fundinn á Arnarhóli.
En hvað ef vinnuveitandi minn leyfir mér ekki að fara?
Sögulega hafa atvinnurekendur stutt, eða að minnsta kosti ekki staðið í vegi fyrir, að konur leggi niður störf á Kvennafrídeginum. Atvinnurekendur hafa nægan tíma til að haga skipulagi sínu þannig að konur og kynsegin fólk þurfi ekki að mæta til vinnu 24. október. Í sumum tilfellum geta atvinnurekendur verið andsnúnir þátttöku eða gefið til kynna að dregið verði af launum starfsfólks sem ekki mætir til vinnu vegna verkfallsins. Í slíkum aðstæðum er það val hvers og eins hvort þau treysti sér til að leggja niður störf og hætta á afleiðingar á sínum vinnustað. Hægt er að senda ábendingar um atvinnurekendur sem hamla þátttöku kvenna og kvára í verkfallinu hér.
Ég er karlmaður. Á ég líka að taka þátt?
Karlmenn leggja ekki niður störf þann 24. október en þeir geta sýnt stuðning sinn í verki með því að taka á sig aukna ábyrgð heima fyrir t.d. við umönnun barna og í vinnu með því að taka að sér verkefni eða vaktir til að liðka fyrir þátttöku samstarfskvenna og -kvára í verkfallinu. Líklegt er að einhverjir skólar verði óstarfhæfir þar sem meginuppistaða vinnuaflsins verður í verkfalli, og því munu feður þurfa að gera ráðstafanir þennan dag.
Kvennaverkfallið er grasrótarviðburður og við þurfum alltaf fleiri hendur. Við viljum helst að helmingur þjóðarinnar leggi niður störf sín og til þess þurfum við að standa saman að því að koma upplýsingunum til þeirra sem þær þurfa. Hér eru leiðir til að taka virkari þátt:
Þú getur skipulagt viðburð í þínu bæjarfélagi!
Við viljum gjarnan sjá viðburði um allt land. Ef þú hfeur áhuga á því að skipuleggja samstöðufund, kröfugöngu, kaffiboð, eða jafnvel femínískt blótkvöld í þínu bæjarfélagi, getur þú haft samband við tengilið landsbyggðarviðburða, Fríðu Rós Valdimarsdóttur frida@bsrb.is
Þú mátt líka skipuleggja viðburð í Reykavík!
Við viljum gjarnan heyra af viðburðum sem varða Kvennaverkfallið. Ef þú ert að skipuleggja viðburð í tengslum við Kvennaverkfallið, vinsamlegast settu inn upplýsingar í þetta form.
Sendu bréf á vinnuveitandann þinn eða fólk sem þú vilt hvetja til að taka þátt
Það þurfa öll að heyra að þessu sem fyrst, svo þau geti gert ráðstafanir. Hér eru bréf sem þú getur hlaðið niður og sent á réttu aðilana:
