Konur í Bolungarvík eru hvattar til að leggja niður vinnu kl. 14:38 mánudaginn 24. október og fylkja liði í Félagsheimili Bolungarvíkur. Göngum út kl. 14:38 og hittumst við Félagsheimilið 14:50 undir kjörorðinu KJARAJAFNRÉTTI STRAX!

Áskorun hefur verið send á forelda barna í Bolungarvík og feður sérstaklega hvattir til að taka þátt með því að sækja börnin sín á leikskóla og í heilsdagsskólann, svo konur geti með góðu móti gengið út.

Nýtum tækifærið, hittumst og spjöllum. Auðvitað eru allir karlmenn velkomnir, jöfn laun eru ekki bara hagsmunamál kvenna heldur allra heimila í landinu.

Meðalatvinnutekjur kvenna eru 70,3% af meðalatvinnutekjum karla. Konur eru því með 29,7% lægri tekjur að meðaltali. Samkvæmt því hafa konur unnið fyrir sínum launum eftir 5 klukkustundir og 38 mínútur miðað við fullan vinnudag frá kl. 9–17. Daglegum vinnuskyldum kvenna er því lokið kl. 14:38.

Þann 24. október árið 1975 lögðu konur um allt land niður vinnu til að sýna fram á mikilvægi vinnuframlags kvenna fyrir þjóðfélagið. Árið 1985 héldum við upp á kvennafrídaginn í annað sinn og aftur lögðu 25.000 konur niður vinnu. Árið 2005 héldum við upp á kvennafrídaginn í þriðja sinn og konur gengu í tugþúsunda tali út af vinnustað á þeirri mínútu þegar þær hættu að fá borgað fyrir störf sín miðað við karla. Þá gengu konur út klukkan 14:08. Árið 2010 gengu konur út klukkan 14:25.

Nú göngum við út klukkan 14:38. Við höfum grætt hálftíma á ellefu árum. Tæplega þrjár mínútur á hverju ári. Með þessu áframhaldi þurfum við að bíða í 52 ár eftir að hafa sömu laun og sömu kjör og karlar, til ársins 2068! Það er óásættanlegt!

Fylgstu með á www.kvennafri.is og facebook.com/kvennafri. Taktu þátt í samræðunum á Twitter undir myllumerkinu #kvennafrí og #jöfnkjör